النمرة غلط !

ماجد.ك 28 يونيو 2020 67 0
سجل الآن وشارك في الحوار واستفد من الخبرات


حكى لنا حنفي بن تامر وقال :
ركبت ميكروباص , وفـ راديو الميكروباص , كان فيه غنوة شغّالة , للمطربة "أصالة " , إسمها " ذاك الغبي " , قولت فـ سري لنفسي , ما بيني وبين نفسي , : معقول " ذاك الغبي " ؟! , دي غنوة فـ ألبوم ؟! , أكيد كل الألبوم , شتايم متغنيّة , ومعمولة فـ أغنية , كدة يبقى فـ الألبوم , غنوة " ذاك الجحش " , وغنوة " ذاك الطحش " , وغنوة " ذاك البغل " , وغنوة " ذاك العجل " , "أصالة " دي مُغنيّة , في قمّة الرومانسيّة ! ,...وخلصت الأغنية , وإشتغلت أغنية , بعدها على طول , كلماتها بتقول :
وكل ما نبدأ نمشي فـ سكة........نلاقيها مكعبلة مش سالكة
كانوا الناس معادن غالية..........دلوقتي بقوا فالسو و سكّة
كانوا الناس لاعيبة بذمة ...........دلوقتي قاعدين ع الدكّة
كانوا الناس كسّيبة بهمة .................دلوقتي بيلموا الفكّة !
كانوا زمان حتى أطفالنا .............بيغنّوا يقولوا : يا مكّة
دلوقتي بقا شوف أطفالنا............بيغنّوا يقولوا : أبو شكّة !
وخلصت الأغنية , وبعد إتناشر ثانية , لقيت قدامي واحدة , شقرا وطخينة شوية , شكلها لا مؤاخذة جايّة , من منطقة باردة ! , فجأة رن تليفونها , ردت على تليفونها
الراكبة الطخينة الشقراء : ألو ؟...مين ؟...عزيزة ؟...بكيزة ؟...لذيذة ؟....لا النمرة غلط حضرتك ...مع السلامة
وبعدها قفلت تليفونها , وتليفونها رن تاني , الست دي في ثواني , ردّت على تليفونها
الراكبة الطخينة الشقراء : ألو ؟...مين ؟...فريدة ؟...تفيدة ؟...داليدا ؟....لا النمرة غلط حضرتك ...مع السلامة
وبعدها قفلت تليفونها , وتليفونها رن تاني , والست دي في ثواني , ردّت على تليفونها !
الراكبة الطخينة الشقراء : ألو ؟...مين ؟...تصدق إن إنتَ راجل ناقص وقليل الأدب وعديم الذوق ؟!...عمال تقول لي بكيزة وداليدا وعزيزة وتفيدة ...قلت لك النمرة غلط يا أخي ...أووف
وبعدها قفلت تليفونها , وتليفونها رن تاني , والست دي في ثواني , ردّت على تليفونها !
الراكبة الطخينة الشقراء : ألو ؟...مين...إنتً مالك أنا إسمي أيه ؟ ...دانتا بارد أوي يا جدع ....قلت لك النمرة غلط مش كل شوية تتصل بيا وتقرفني بقا .....والله هاقفل السكة في وشك وأعمل لك بلوك ....إنت مالك ؟!....غور في داهية ...ٍمع السلامة
وبعدها قفلت تليفونها , وتليفونها رن تاني , رُحت أنا في ثواني , خاطف منها تليفونها , وقايل لها كلمتين , أبرك من متين
حنفي بن تامر : غور في داهية ومع السلامة إزاي يعني ؟!!
الراكبة الطخينة الشقراء : إنت مين ؟...وإزاي تاخد مني تليفوني كدة ؟!
حنفي بن تامر : أنا راكب راكب وراكي ...وأخدت تليفونك خطف منك .... إتفضلي يا ستي
وإديت لها تليفونها , بدل ما يجن جنونها , وتضربني تعمل لي عاهة , وكملت كلامي معاها ...
حنفي ( بإنزعاج ) : حضرتك عمّالة تعيدي وتزيدي الكلام وصوتك عالي صدّعتينا ....يا تعملي للشخص دا بلوك ...يا تعملي تليفونك صامت وتأجلي المكالمة لحد ما تنزلي من الميكروباص مراعاة لودان ودماغ الناس اللي حواليكي ...مش لازم تعرّفينا يعني إن فيه ناس بتعاكس حضرتك !
الراكبة الطخينة الشقراء : وإنت مالك ؟!!...إنت وصي عليا في تليفوني كمان ؟؟...انا هلاقيها منك وألا من الناس الباردة اللي عمّالة تتصل بيا وتفوّر دمي ؟!...
إتدخلوا الركاب , دا يقول لي : خليك فـ حالك , ودي تقول لي: وإنتَ مالك ؟ , ودا يقول بإكتئاب , : باظوا خلاص الشباب , فجأة اللي راكب جمبي , وجمبه لازق فـ جمبي , كلّم الست الشقرا , التخينة بنبرة , ناعمة أوي وطرية , وكلها حنيّة !
الراكب اللي جمب حنفي : يا ست الكل ولا تزعّلي نفسك ..إديني تليفونك قبل ما الشخص قليل الذوق دا يكلّمك تاني ...ولكي عليا أشحن لك رصيد بـ 100 جنيه عشان تعرفي تشتميه كويس
فجأة الست الشقرا , رق قلبها ! , لفّت له بجمبها , وبصّت له بعيونها , وإدّت له تليفونها , وضحكت له ضحكة صفرا
الراكبة الطخينة الشقراء ( مبتسمة ) : والله انت راجل ذوق ومحترم وكلك واجب ...تليفوني معاك أهوه يا اخويا ...ما تنساش تسجّل رقمك معرفة الرجّالة الجدعان كنوز والله في الزمان دا
بإعجاب بصّوله , الرّكاب ودعولُه , كذا واحد قالوا له , : الله يصلح حالك , ويكتر من أمثالك , وواحدة قالت له : شهم , عندك إحساس وفهم , وواحدة قالت له : ذوق , وأخلاقك عالية لفوق , وأنا من من بعد القسية , مشتاق نظرة حنّية !
قال حنفي بن تامر : نزلت م الميكروباص , وأنا نفسي مسدودة , كأن فـ زوري دودة , لا أنا قادر أبلعها , ولا قادر أرجّعها , كنت على أخري خلاص , وبمنتهى الإخلاص , والصبر والإحتمال , سألت نفسي سؤال , : بقي اللي يجي يمين , يلقى حواليه لايمين , يامة وناس تديه , فـ جنابه وتغلط فيه , واللي يجي شمال , يبقى عادي وشغّال , وطيب وإبن حلال ؟! ..والختام

نشر بتاريخ 28 يونيو 2020 10:05 م
آخر تحرير 01 يوليو 2020 02:44 م

أضف تعليق

لا يوجد تعليقات

آخر القراء
وائل.ا 2020-09-04T00:10:26+02:00
Amena.A 2020-08-25T18:23:57+02:00
Rowan.E 2020-08-03T15:14:23+02:00
Besan.Z 2020-07-17T01:18:12+02:00
خيري.ا 2020-07-07T19:51:27+02:00
عبير.ح 2020-07-06T14:35:09+02:00
Wael.S 2020-07-02T19:57:21+02:00
حمد.ا 2020-07-02T08:59:50+02:00
فتحى.م 2020-06-30T20:14:06+02:00
Abdulaziz.M 2020-06-30T16:26:45+02:00
محمد.ا 2020-06-29T16:44:58+02:00
همام.ا 2020-06-29T07:38:40+02:00
Basma.G 2020-06-29T03:20:14+02:00