تحكمات !

ماجد.ك 28 يونيو 2020 91 0
سجل الآن وشارك في الحوار واستفد من الخبرات
3 3


حكى لنا حنفي بن تامر وقال :
رُحت لحَجّة حكمات , مُدرّبة كِشريّة , في التنمية البشريّة , قسم التحكمات , ...رُحت لها الأكاديمية , بتاعتها ...حاجة مِيّة مِيّة , ....وكانت هيّا حَضّرِتها , عندها دورة ساعتها , دورة تنمية بشريّة ! , طبعاً دَخَلّت عليها , بعدين سَلّمت عليها , فادّيتني أبليكيشن , فَمَليت الأبليكيشن , بايدي المِدلّدِلَة, وإدّيتها الأبليكيشن , بَصّت في الأبليكيشن , بعنيها المفنجلة , وبسحنتها التِلِمَة , كلّمتني كام كِلّمة
حجة حكمات : ..تمام الله ينوّر ....هتخُش الدورة معانا بإذن الله ؟
حنفي : بإذن الله
حجة حكمات : لازم قبل ما تخُش الدورة معانا ..نعمل لك إمتحان الأول في الكتاب اللى أنا منزّلاه في السوق ( تحكم في حياتك )..إنتَ قَرَيت الكتاب ؟
حنفي : لأ .....هو كتاب حضّرتك بكام في السوق ؟
حجة حكمات : مش بكتير بحوالي 50 جنيه ....
حنفي : يامة أوى .....دة كتاب حياتي ياعين بتاع الحج حسن لاسمر الله يرحمه كان عامل 10 جنيه وأوّل ما نزل في السوق كسر الدنيا...وإنتي كتابك ب 50 جنيه وبيتكلّم عن التحكمات يعني ماحدّش هيجيبه أساساً....شوفي ياحجة أنا مُسّتَعِد للإمتحان من غير ما أقرا الكتاب ...أنا لافف وداير والحياة علّمِتني كتير
حجة تحكمات : خلّي بالك رسوم الإمتحان 200 جنيه عشان دي منحة مُدّعمة من المركز الهندي اللى في كندا ....تدفعهم وبعد ما تخُش الدورة وتنجح تستردهم تاني
حنفي ( مندهشاً ) : دي قرعة بقا
حجة تحكمات : لأ دي دورة نازل عليها منحة ..
حنفي : حلوة اللعبة دي ....طب أنا ممكن أمّتحن دلوقتي ؟
حجة حكمات : أيوة ...بس هتدفع الأوّل
حنفي : ماشي
ودفعت المتين جنيه , جنيه ينطح جنيه , من غير لا أيه ولا ليه ,.....وبعد أمّا إنّدَفعّت , وإتهوّرَت ودَفَعّت , حَجّة حكمات إبّتَسَمِت , وبانت سِنانها صَفّرا , ولسانها اللى عليه عَفَرة , ياريتها ما إبّتَسَمِت ! , ....وبعدين كلّمتني , بنعومة وثبّتتني
حجة تحكمات (بنعومة ) : نبدأ ؟
حنفي (بحماس ) : نبدأ
حجة تحكمات : السؤال الأول : أكمل ...عشان الواحد يتحكّم في حياته صح ويعيش كإنسان قادر ياخد حقّه في المجتمع لازم يطوّل .....
حنفي : إيده
حجة تحكمات : ويقصر ......
حنفي : في الكلام
حجة تحكمات : وما يصغّرّش .......
حنفي : نفسه
حجة تحكمات : وما يكبرّش ...........
حنفي : بحد ...ياخد حقه بإيده على طول
حجة تحكمات : ويمسك.....
حنفي : فـ اللى قدامه
حجة تحكمات : ويسيب ....
حنفي : اللى قدامه مِتعوّر
حجة تحكمات : غَلَط كل إجاباتك غَلَط ... عشان الواحد يتحكّم في حياته صح ويعيش كإنسان قادر ياخد حقه في المجتمع لازم يطوّل باله ...ويقصّر سِكك الشر... وما يصغّرّش من حجّمه ...وما يكبّرّش من حجم المشكلة... ويمسك أعصابه ...ويسيب الأمور على ربنا
حنفي : طب السؤال التاني أيه ؟
حجة تحكمات : السؤال الثاني : أكمل ...عشان الواحدة تتحكّم في حياتها صح وتعيش كإنسانه جميلة في المجتمع لازم تطوّل .....
حنفي : شعرها
حجة تحكمات: وتقصّر ....
حنفي : جيبتها ؟
حجة تحكمات : وتضيّق ....
حنفي : بنطلوناتها
حجة تحكمات : وتوسّع ......
حنفي : دايرة علاقاتها مع الشباب المنحرفين
حجة تحكمات : وتعلّي .....
حنفي : صوت ضحكتها
حجة تحكمات : وتوطّي ......
حنفي : صوتها وهيّا بتكلم الواد المُز بتاعها
حجة تحكمات : وتصغّر .......
حنفي : صدرها
حجة تحكمات : وتكبّر..........
حنفي : شفايفها ؟
حجة تحكمات : غَلَط كل إجاباتك غَلَط ... الواحدة عشان تعيش كإنسانه جميلة في المجتمع لازم تطوّل بالها وتقصّر كلامها وتضيّق دايرة الخلاف ...وتوسّع دايرة الحوار... وتعلّى مزاجها ...وتوطّي صوتها ....وتصغّر من حجم أى مُشكلة تحصل ليها.... وتكبّر مخها وهي بتحل المشكلة
حنفي : تكبر مخها يعني تِطنّش ؟
حجة حكمات : لا تكبّر مُخّها يعني تستوعب المشكلة بمُخّها وتحلّلها وتحلّها واحدة واحدة .....والشاعرة بتقول :
مش محتاجة أكبّر مُخّي واطنّش كل اللي حوليّا
أنا محتاجة أكبّر عقلي وأفهم أيه ليّا وأيه عليّا
حنفي : طب نخش ع السؤال التالت
حجة تحكمات : السؤال التالت : أكمل ...عشان الواحد يتحكّم في حياته صح ويعيش كإنسان مُتديّن وفعّال في المجتمع لازم يطول .....
حنفي : دَقّنه
حجة تحكمات : ويقصّر.........
حنفي : بنطلونه
حجة حكمات : وينشر علناً......
حنفي : فتاويه على القنوات والمواقع
حجة حكمات : ويلم سراً.........
حنفي : فلوس من رجال الأعمال والمستثمرين
حجة تحكمات : ويفتح ............
حنفي : قناة إسلامية تشتغل لحسابه
حجة تحكمات : ويقفل ............
حنفي : كل المحلات الفاجرة الماجنة وخصوصاً اللي بتبيع خمرة
حجة تحكمات : غَلَطْ كل إجاباتك غَلَط ...عشان الواحد يتحكَم في حياته صح ويعيش كإنسان مُتديّن وفَعّال في المجتمع لازم يطوّل نَفَسُه... ويقصّر سكك الشر... وينشر علناً السلام بين الناس... ويلم سراً تبرّعات لصالح الفقراء والأيتام... ويفتح قلبه لكل إنسان .....ويقفل منافذ الشيطان إليه
حنفي : طب فيه سؤال رابع ؟
حجة تحكمات : أيوة السؤال الرابع : أكمل ...
حنفي ( مبتسماً ) : آهو دا جديد دا غير كل اللي فاتوا
حجة تحكمات : عشان الواحد يتحكّم في حياته صح ويعيش كمدير ناجح لازم يوسع .....
حنفي : كِرّشُه
حجة حكمات : ويضيّق ......
حنفي : مُخّه
حجة حكمات : ويبني .....
حنفي : مستقبل ولاده اللى هيوّرثوا المنصب بعديه
حجة حكمات : ويهد .....
حنفي : حيّل الناس اللى شغاله معاه
حجة تحكمات : ويسخّن.....
حنفي : الناس اللى معاه في الشغل على بعض ويعمل بينهم مشكلة
وحجة تحكمات : ويبرّد .....
حنفي : الأوضة بتاعتُه بالتكييف المبرد
حجة تحكمات : ويرخّي......
حنفي : أعصابه ع الآخر ولا كإنّه هوّا اللي ورا البلاوي اللي بتحصل فـ الشُغل
حجة تحكمات : ويشِد .......
حنفي : ناس غلابة مالهاش ذنب في صُنّع البلاوي اللي بتحصل فـ الشُغل
حجة تحكمات : غَلَط كُل إجاباتك غَلَط .....عشان الواحد يتحكَم في حياته الحياتية صح ويعيش كمدير ناجح لازم يوسّع صدره ..ويضيق دائرة نفقاته ...ويبني المؤسسة اللي هوّا بيديرها... ويهدّ السياسات والشروط الروتينية القديمة......ويسخّن حديد العزم ويخبط عليه وهوّا سخن ....ويبرّد المشاحنات الساخنة بين الناس بأسلوبه الودي اللطيف ....ويرخّي حبال الصبر في انجاز الأعمال....ويشد على أيادي مرؤوسيه عشان ينجزوا الأعمال بكفاءه وفاعلية ...
حنفي : فيه أسئلة تانية ؟!
حجة حكمات : لأ خلاص ما فيش
حنفي : طيب درجتى كام ؟
حجة حكمات : صِفّر ....للأسف مش هتخُش معانا الدورة
حنفي : طب والمتين جنيه ؟
حجة حكمات : دول رسم إمتحان
حنفي : طيب المفروض أسّتَرِدّهُم ما يبقاش فشل وخراب ديار
حجة حكمات : لا خلاص راحوا عليك ....
حنفي ( بغضب ) : إزّاى ؟!!
حجة حكمات : اللى بيسترِد الفلوس هوّا اللى بيشتري الكتاب وبعدين يقراه ويدفع رسم إمتحان ويمتحن في الكتاب , وبعد ما ينجح يخُش الدورة ويمتحن في آخر الدورة وبعدين لو نجح في الإمتحان النهائي... ياخُد الشهادة ويسترد فلوسه في الآخر خالص
حنفي (بإنفعال) : وطبعاً على ما ينجح تكونوا إنتوا دوّرتوا الفلوس في السوق ست سبع دورات وعملتوا قد كدة على قلبكو ...دة غير طبعا اللي بيمتحن ويفشل والفلوس بتروح عليه ...دي كدة محنة مش منحة !.....أنا عاوز فلوسي يا ولية انتي
فجأة لقيت إتنين , جاردات والإتنين , جم وقفوا في صفي , ما اعرفش جم منين؟ , وما شاء الله الاتنين , ده سند دقنه على كتفي , ودة سند دقنه على كتفي , دة م الناحية اليمين , ودة م الناحية الشمين , ..أنا شوفتهم بلّمت , وأستسلمت وسلّمت , واتكلّمت بحماسة , قصدي ..بأدب وحساسة
حنفي ( مبتسماً ) : كان نفسي أكون معاكم والله في الدورة دي ....بس يلّا اللى حصل بقا .....ما فيش دورات بمنح قريب ؟
حجة حكمات : أمّا تِخّلَص الدورة دي هاقول لك ...مش إنتَ مسجّل إسمك وبياناتك في الأبليكشن اللى إدّيتهولك تملاه ؟
حنفي : آه
حجة حكمات : خلاص أمّا يبقى فيه دورات مدعمة هابقى أبلغّك بالتليفون ....أو تابع موقعنا ع النت وإنتَ تعرف
حنفي : الله انتو لكم موقع ع النت ؟
حجة تحكمات : أيوة طبعا و....
حنفي (مبتسما) : طب فيه شات روم على الموقع دة ؟
حجة تحكمات ( بإشمئزاز ) : شات روم ؟!!....آنست ونوّرت يا أستاذ حنفي
قال حنفي بن تامر : ما صَدّقت قالت كدة , أوّل ما قالت كدة , بخِفّة وإسّتِعّباط , إتدّيّرت وبعدين , عَدّيت بجسمي ما بين , الإتنين الجاردات , وجريت وأنا رافع الراية , ولا بصيت ورايا , ....وبعد أمّا اختفيت , من عندهم هَدِيت , وبقيت أقول لنفسي , ما بيني وبين نفسي , : مش مُهِم الفلوس , طز في الفلوس , الحمد لله , والشكر لله , إنّى سيبت المكان , وأنا لِسّه إنسان , على قيد الحياة , ..الحمد لله , طلعت منها على خير , صاغ سليم من غير , خساير وإصابات , مش طالبة هي عصابات , وأكشن وجاكي شان , آه دة الواحد لو كان , بمبك له بمبوكّتين , مع البودي جاردين , اللى كانوا فوق دول كان , زمانه فـ خبر كان , آه كان زمانه قد مات , مُتأثّر بالكَدَمات ......والختام

https://soundeals.ams3.digitaloceanspaces.com/uploads/2020/06/28/47180/1593373678-Y32.jpg

نشر بتاريخ 28 يونيو 2020 09:48 م
آخر تحرير 01 يوليو 2020 02:46 م

أضف تعليق

لا يوجد تعليقات