خناقة كبيرة اول يوم رمضان مش لشر لا سمح الله لكن الخناقة بتكون بين القرايب على مين اللي هيفطر التاني عنده اول يوم رمضان - العزومات- هي دعوة حد من العيلة لباقي افرادها عشان يفطروا مع بعض و هي عادة قديمة عند المصريين باختلاف الزمان و مظهر من مظاهر صلة الرحم و الترابط بين الناس و دايما العزومات بتسيب ذكرى حلوة عند كل افراد العيلة و اللي زعلان فيها بيتصالح و الحزين بيفرح و دايما مبتخلاش من نكت خالك البايخة اللي بتمثل فيها انها ضحكتك - من باب جبر الخواطر يعني- او عمك اللي بيسألك دايما صايم ولا زي كل سنة و مع انتهاء السهرة بيبدأ فرد من العيلة يعزم البقية عنده و تستمر العزومات لحد ما كل فرد يعزم الباقي لكن للاسف العاادة دي قربت تموت بسبب نسيان الناس لصلة الرحم او لموت شخص معين كان بمثابة الرابط الاساسي لباقي الافراد او لتشتت العيلة ما بين فلان سافر و فلان بعد بس ان شاء الله ترجع تاني و تبقى اقوى من الاول شوف بقى هتعزم ولا هتتعزم اول يوم رمضان
