منظمه اليونيسيف العالميه كانت عامله اعلان من كام سنه بطوله الفنان احمد حلمي كان الفنان قاعد فيه ف مطعم مع اسرته اللي منهم طفل صغير تقريبا 3 سنين وبيحكيلهم عن الواوا اللي ف كوعه قبل م ييجي الويتر و الفنان يطلب منه يجيبله امبو ف الويتر بيرد عليه بمنتهي الجديه بيقوله : عايز امبو قد الفسفوسه ولا قد الدنيا ، ف بيختار الامبو اللي قد الدنيا ، وبعدها الفنان بدأ يعمل حادي بادي بين إنه ياكل كوكو ولا سمك ولكن للاسف الكوكو طلع بح منظمة اليونيسيف وجهت الحملة دي للأهالي تحت عنوان (السنين الأولى بتفرق) وبتنصحهم يسموا الاشياء باسمائها الاساسيه , لان لما بنعلم أطفالنا الحاجات بأساميها الطبيعية ده بيساعد كتير في تنمية قدراتهم طيب ايه اصل الكلمات دي ومن امتي بدأ استخدامها معظم الكلمات والمصطلحات اللي بيستخدمها المصريين باللغه العاميه في الأصل مفردات فرعونية كان يتحدث بها الفراعنة وقدماء المصريين ، استمرت الكلمات دي متداولة، من 7 آلاف السنين ولحد دلوقتي ، وامتزجت في الكلمات المصرية والعربية، لحد م تجاوزت آلاف الكلمات، وبقت ضمن لغة المصريين وكلامهم اليومي ومن أشهر الكلمات دي الكلمات اللي احنا كلنا بنستخدمها تلقائيا مع أي طفل بنشوفه زي امبو اللي معناها ميه أو اشرب وواوا اللي معناها الم أو وجع و نونو يعمي الطفل الصغير و كُخة معناها قذارة أما البعبع فكان عفريت خيالي بيخوفوا بيه الأطفال علشان يناموا وتاتا تاتا معناها خطوة خطوة وبح يعني انتهى وخلص ممكن نفسر استخدامنا للكلمات دي مع الاطفال لحد دلوقتي إنها صغيره مختصره ونطقها سهل ، ولكن برده لازم ناخد بالنا إن ده هيأثر علي تطور وعي وذكاء الطفل فناخد بالنا ونحاول نقلل منها
