كلمات علي مر العصور لو لسه فاكرين إن لغتنا العاميه الجميله كلها لغه عربيه يبقي محتاجين تصححوا معلوماتكم لغتنا العاميه متكونه من 12 لغه أو أكثر ، ببساطه زي م النكته بتقول اخدنا من كل رجل قبيله يعني اخدنا كلمتين من هنا علي 3 كلمات من هنا وعملنا لغه جديده اسمها المصريه العاميه زمان اخدنا ف المدرسه ف ماده التاريخ إن مصرنا الحبيبه اتعرضت للغزو من بلاد مختلفه منها الاحتلال البريطاني والفرنسي وحتي العثماني اللي هم الاتراك ده بجانب تأثرنا بالثقافه الفرعونيه والقبطيه واليونانيه دلوقتي هقولكم علي بعض الكلمات وحاولوا تخمنوا معايا الكلمات دي أصلها ايه لما نقول ( بورصه ، تلغراف ، اسطبل ، اسمنت ، ونش ، بوليس ، راديو ، تي شيرت ) بالظبط كده بنتكلم باللغه الانجليزيه طيب لما نقول ( بنك ، جاتوه ، اسانسير ، اوتوماتيك ، اجنده ، ارشيف ، اتيكيت ، شوفير ) اكيد لاحظتوا إنها كلمات فرنسيه نصعبها شويه بقي لما نقول ( مشوار ، لمبه، ماسوره ، كنبه ، استماره ، ابله أو أبيه ، باشا ) ايوه بالظبط كلمات تركيه وعندنا كلمات كتير أصلها قبطي زي ( حنفيه ، حنطور ، فسيخ ، مهووس ، مهيص ) وكلمات يوناني زي ( ترابيزه ، فانوس ، استراتيجيه ، اساطير ) ده غير كلمات بسيطه من النوبيه والبربريه والارمنيه والعبريه طبعا اللغه العربيه هى الاصل وبتشكل النسبه الأكبر من كلامنا وده شئ كلنا نفتخر بيه ولازم نشجع اولادنا إنهم يتعلموا وينموا لغتهم العربيه ونفهمهم إنها لغه عظيمه وربنا اختارها من بين لغات العالم لتكون لغه القران ولازم يفتخروا بيها دلوقتي من وجهه نظركم ايه اكتر لغه أو ثقافه اجنبيه احنا متأثرين بيها وهل ده مأثر علي مجتمعنا بالايجاب ولا بالسلب ؟
